سلام الله (41) : لـ | وليد حمدي اسرائيل

سلام الله
على البنت اللي مش صعبة و مش سهلة . على البنت اللي بتقدم عسل صافي و تمنع قرصة النحلة . على البنت اللي بتأمن طريق بيهون الرحلة . على البنت اللي مهما باشوف بنات حلوة .. بقلبي باحسها الأحلى .

سلام الله (40) : لـ | وليد حمدي اسرائيل

سلام الله
على البنت اللي مش رمادية ف انفعالاتها و ردودها .. بتثبت بالغياب ان الغياب نوع تاني لوجودها
حقيقية
كما فعل الهوا ع النار . و فعل النار على المية .. لبسمتها المطر ينزل . و ف بكاها . بتحصل هزة أرضية
سلام الله
على البنت اللي ع الفطرة . اللي لسة سليمة النية

سلام الله (39) : لـ | وليد حمدي اسرائيل

سلام الله
على البنت الجديرة بإعتكاف روحي ف محرابها .. خلع قلبي جدور كل اللي قبليها و على عرشه و نصبها .. رجع بيها لصباه تاني . صبح تلميذ ف كتابها .. بقى شاعر على اديها . ف يكتب إيه ؟ لمين ؟ إلا انه يكتب ليها طول عمره و يكتبها
سلام الله
على البنت اللي مش هاعطش مادمت بعيني باشربها

سلام الله (38) : لـ | وليد حمدي اسرائيل

سلام الله
على البنت اللي بدموعها بتثبت ان درب الحق صعبه مغطي على سهله .. عنيها العالم المبصر ف عالم عصبه جهله .. قوية برقة . مش فظة . و فين الخير ما كان موجود بيندها . و فين ما تكون . بتندهله .. بتوسع كالسما للطير و تبقى جناحه و ملاذه و تبقى غنوته و أهله
سلام الله على البنت اللي عارفة ان السلام ليها . و عارفة ان السلام دا هيا تستاهله

سلام الله (37) : لـ | وليد اسرائيل

سلام الله
على البنت اللي بتطهرني من فعل الزمن فيا .. على البنت اللي عاملت قلبي من حيث انه ينفع يبقى زهرية .. على البنت اللي ف عيونها دفا من نور و من مية .. على البنت اللي صوتها موسيقى من حزن و رومانسية
سلام الله
على البنت الحقيقية الخرافية

سلام الله (36) : لـ | وليد حمدي اسرائيل

سلام الله
على البنت اللي ملامحها بتشبه صبح يوم العيد .. قابلت هواها بالصدفة . هوى عاصي على المواعيد .. تغير منها الطيور و النور . و كل السمر . كل البيض .. أغنيلها . مفيش فايدة . و أبكيلها . مفيش فايدة . تقول : انا صعبة الترويض . لكن حاول كمان مرة
سلام الله
على البنت اللي واثقة بإني عاشقها . و واثقة بإنها درة

سلام الله (35) : لـ | وليد حمدي اسرائيل

سلام الله
على البنت اللي قدرت في عيوني تكون بنات حوا .. بتسلب كل شئ فيا و انا و لا حول و لا قوة .. مسلم ليها بالفطرة . باسلم ليها من كلمة . باسلم ليها من نظرة . باسلم ليها من بسمة .. رقيقة كإنها النسمة اللي داعبت وردة مشتاقة لنسيم الفجر .. قريبة و هيا وصلاني . و برده قريبة عز الهجر .. و حتى ف وقت ما بتقسى . بتقسى بذوق . أنا وقعت اما حبيتها . لكن فعلا وقعت لفوق
سلام الله
على البنت اللي ثايرة ف دمي ثورة ماتنطفيش بالشوق

سلام الله (34) : لـ | وليد حمدي اسرائيل

سلام الله
على البنت اللي مش شبه البنات ف اللي البنات اتشابهوا جمعا فيه .. باحس مجازا ان البنت دي . بفؤاد بيوحى إليه .. فريدة ف كل ما بتعمل . فريدة ف كل ما بتقول . كلامها ف عز ما بتقصد يكون علقم . كلام معسول .. دا لو كافر ف يوم بص ل ملامحها يآمن عن يقين بالله .. عنيها الموطن الآمن لقلب اتذل في منفاه . أنا مش شاعر اتمكن من المجازات ف غناها .. أنا باكتبها من دمي . عشان من دمي باهواها . و هاهواها لحين ما أموت
سلام الله
على البنت اللي مالكة الرقة و الجبروت

سلام الله (33) : لـ | وليد حمدي اسرائيل

سلام الله
على البنت اللي بتبكيني . و تعزيني ف بكايا .. نبيلة . و نبلها آية .. ماقبلتش ان تأسرني الا و انا قلبي بدرع و سيف .. و ماسابيتهوش يهون أو يرفع الراية .. تغيب عني بشكل ما . بيثبت إنها معايا .. قريبة ف عز ما بتبعد .. رقيقة ف عز ما بتعند .. رحيمة ف عز ما بتجلد .. و إيه غير حبها يعمرني و انا أجوف ؟ .. أنا من غيرها كنت ازاي هاشوف و اعرف ؟ و اكون أشجع و اكون أشرف .. و من غيرها يكونلي منين جلد ع الخوف و ع الأحزان ؟ .. مبطن حبها قلبي قطيفة و زان .. فراش ناعم لسكانه . و يستحمل مسامير الزمان لو خان .. و لو مابقيتش ! هابقى ازاي مصدق ان انا انسان ؟ .. و آه من فعل قولة " لو " .. يقين لابس قناع الشك
سلام الله
على البنت اللي كل الدنيا خارج قلبها الواسع ماهياش إلا خانة يك

سلام الله (32) : لـ | وليد حمدي اسرائيل

سلام الله
على البنت اللي لو وقفت قصاد مرايتها . مرايتها هاتحسد كل ما ف الكون ف يوم خد قلبها بالحضن .. على البنت اللي كان ينقص لملامحها عشان تبقى لها أكبر نصيب م الحسن . حبة حزن .. على البنت اللي بسمة فرحها زي قرنفلة صابحة .. و بسمة حزنها آخر طريق بيودي للفرحة .. على البنت اللي حتى أنينها متنغم . كأن ضلوعها دي نايات .. نغم لا يسمعوه إلا عباد الله . ما يسمعهوش عباد اللات .. على البنت اللي نايرة ف كل قلب بصير
سلام الله
على البنت اللي مستعصية ع التفسير

سلام الله (31) : لـ | وليد حمدي اسرائيل

سلام الله
على البنت اللي بتحضر شيطان شعري بطلة ملائكية شهية فواحة .. عنيها ف عز ما بار الوجود كله مازالت للخضار واحة .. أنا بالرغم من اني بائن و دمي متصفي لكن شراييني مرتاحة .. منين ما بتبقى موجودة بيصفى الجو و ينسم .. ف سلم قلبها السامي يارب و زيده نور متحلي بالحكمة
سلام الله
على البنت اللي هيا الأنقى و الأسمى
....................................................
بائن : بعيد

سلام الله (30) : لـ | وليد حمدي اسرائيل

سلام الله
على البنت اللي بترمم شروخ روحي بنظرة عطوفة ممزوجة بشغف صادق .. كلامها بيشتهيه قلبي سواء كان حلو أو حادق .. غناها كأنه تعويذة . بيأسرني بدون ما اوعى .. و صوتها و هيا بتناديني . يا الله على الروعة .. و يوم لما تغيب عني و رعشة جسمي م اللوعة .. و آه من حسنها لما بترجع من غياب بعيون بتلمع م الحنين و الشوق
سلام الله
على البنت اللي حتى غروبها برده شروق

سلام الله (29) : لـ | وليد حمدي اسرائيل

سلام الله
على البنت اللي بتعلمني احب الناس . و ما اكرهمش لو غابوا .. قالتلي القلب يبقى سليم إذا و هما بعاد ع العين فضل وافي لأحبابه .. قالتلي الحب . أصدق حب هو اللي انت ما بتعرفش أسبابه .. و ترضى بمره لو حتى طغى على طعم عنابه .. قالتلي الحب أحلى ما فيه . بيحفظ نظرة الصادق و يفضح دمع كدابه .. ف كون راهب ف محرابه بكل ما تمتلك من صدق
سلام الله
على البنت اللي باوصل بيها إلى آخر حدود العشق

سلام الله (28) : لـ | وليد حمدي اسرائيل

سلام الله
على البنت اللي قلبي يادوب لمحها . كأنه ما صدق .. نفض . خلى ضلوعي الصلبة تتشقق .. أقول : مالك ؟ يزيد نبضه . أقول : اصبر . يقول : أعشق .. كما لو كان سجين شاف البراح من بعد طول حبسة .. يا شوقك للمطر ياللي اتوجدت ف منطقة يابسة .. يا ملهوف ع الجمال طبع الجمال في رقته واعر .. ما تستعذبش كرابيجه . ما خلقكش الإله إلا عشان تسكن . ما خلقكش الإله علشان تكون شاعر .. إذا كل اللي هاتنوله من الحب . البكا . إهرب .. ما تشربش الا ما يسكر و إلا ف أوعى يوم تشرب .. و قد ما تشتهي إبعد . طريق البعد بيقرب .. و قولت كتير . عند فيا . كلامي معاه و لا بيفرق
سلام الله
على البنت اللي ضد العقل و المنطق

سلام الله (27) : لـ | وليد حمدي اسرائيل

سلام الله
على البنت اللي مش بتسيب غيوم من شمسي تتمكن .. و بتعلمني لضم الخيط مابين الصعب و الممكن .. و بتفلسفني . أتفلسف.. و بتبسطني . أتبسط .. و بتهديني لما أثور . و بتسامحني لما اغلط .. و بتسيب روحها جوايا ف وقت ما اكون كيان مصمت .. و بتكون بير و انا باحكي . و بتكون أم لما اشكي .. و من عينها بتنزل دمعتي لما أكون في حضنها بابكي .. مابين المرسى و المرسى باحب اغرق . مادامت ف الغرق قشة .. و اسيب البرد ينهشني عشان تلمسني بكفوفها برعشة تسكن الرعشة .. ضلوعي الصلبة . مين قواها ؟ غير أم الضلوع هشة .. ف غيرها ازاي يشوف قلبي ؟ و قلبي يحب غيرها ازاي ؟
سلام الله
على البنت اللي هاتكون برده حبي الجاي

سلام الله (26) : لـ | وليد حمدي اسرائيل

سلام الله
على البنت اللي ملهاش ف البنات صورة .. طليقة . و هن أكترهن حرية بروح بالوهم مأسورة .. بتقلب حزنها لنكتة .. يشوفها الحزن فزورة .. تغني ف عز ما تبكي . ف ييأس دمعها و يرحل .. يا قهر الحزن لما تفك ضفايرها و تتمايل و تتكحل .. و لما بتخطف النجمات . تحولهم فراش على وردها حايم
سلام الله
على البنت اللي من روحها بتشرق شمس حقيقية بتسبح في فضا واسع و مش غايم

سلام الله (26) : لـ | وليد حمدي اسرائيل

سلام الله
على البنت اللي فوضاها بيغلب فعلها المنهج .. عنيها الدوامات ملهمش لا مدخل و لا مخرج .. رفض قلبي قلوب كاملة و أدمن حبها الأعرج .. أقول إيه اللي أجبرني أدوس ع الجمر و اتذكر بإن العاشق الصادق بصير أعمى .. ألوم روحي . تقول روحي . سكاكينها كانت ناعمة .. ألوم عيني . تقول عيني . كانت غلطة و مش بالسهل تتكرر .. ألوم قلبي . يقول قلبي . ما حلانيش سواها ف مهما هاتقولوا . أنا هافضل أقول البنت دي سكر
سلام الله
على البنت اللي مهما هاشوف بنات غيرها . هاتفضل برده هيا الأدهى و الأمكر

سلام الله (25) : لـ | وليد حمدي اسرائيل

سلام الله
على البنت اللي وقت ما تبقى موجودة باكون طاير كما العصفور و ف غيابها كما البالون .. أشاور للهوى عليها يقولي أقل ما فيها تكون بالبنت دي مجنون .. ألاقي منين كلام يقدر يصور قلب وسع الكون ؟ .. عنيها ف عز ما تدمع لها ضحكة بصوت عالي .. عشان أقدر أحب البنت دي قد اللي تستاهله هاعوز يجي 1000 قلب و 1000 بال خالي .. و يمكن برده يبقى فيه شئ كمان ناقص
سلام الله
على البنت البسيطة المربكة خالص

سلام الله (24) : لـ | وليد حمدي اسرائيل

سلام الله
على البنت اللي بتمكيج بنات أفكاري و تزينهم بتيجان لايقة ع الفساتين .. أصيغهم ع الورق أشعار . ف يتقلب الورق بساتين .. يا أجمل ملهمة . ممكن ؟ تقوليلي . عنيكي الدوامات آخري معاهم فين ؟ .. ف وقت ما بابقى جواهم باكون سكران شريد تايه .. و وقت ما أبقى براهم باكون مطفي . و طعم الخلق متشابه .. خلاص مابقيتش باتمنى الا يكمل عمري بوجودك .. أكون حبة ندى حتى و ألقى مكان على ورودك .. دموع نايي الحزين تنشف بأنغام دافية من عودك .. أو اللي انتي تشوفيه حتى . أنا ف كل الحالات راضي
سلام الله
على البنت اللي هيا الجاني و القاضي

سلام الله (23) : لـ | وليد حمدي اسرائيل

سلام الله
على البنت اللي ف عنيها . بلاقي جواب لأي سؤال .. و الاقي سبيل لأي محال .. و الاقي جمال ما زيه جمال .. و في ضمتها ضي و نار .. و سر بيفضح الأسرار .. و شعر يعجز الأشعار .. و ياما حاجات كتير تانية . تعبت الاقيلها يوم تفسير
سلام الله
على البنت هيا العذب و المالح . و هيا الشر . هيا الخي

سلام الله (22) : لـ | وليد حمدي اسرائيل

سلام الله
على البنت اللي خلقت جوة قلبي شعور عجزت الاقيله اسم و وصف .. باشوف ف عنيها حب كبير برئ طاهر و صافي ما لوثوش العطف .. بس كمان باحس ف نظرتي ليهم كأني بابوس ايدين المشنقة علشان على رقبتي تضيق و تلف ... سألت الفيلسوف لكن جوابه ماحلش العقدة .. سألت طبيبي . عاملني كواحد من ألاف مرضى .. سألت العرافات لكن كلامهم عكس ما أرضى .. ف جايلك أسألك عنك و كل منايا تقوليلي أنا ليا ف قلبك إيه ؟
سلام الله على البنت اللي بارضى بكل شئ حتى اللي يأذيني مادامت هيا جادت بيه

سلام الله (21) : لـ | وليد حمدي اسرائيل

سلام الله
على البنت اللي مش مسجونة جوة إطار .. و مش متطرفة و تايهة مابين أفكارها و الأفكار .. و مش بترش نور روحها بمية نار .. سلام على عقلها الموزون . سلام على فعلها المجنون .. سلام على قلبها المعجون بماء أنزل من الفردوس . يصب من الخمور أنهار
سلام الله على البنت اللي ظهرتلي و انا مليل . ف بدلت الضلام بنهار

سلام الله (20) : لـ | وليد حمدي اسرائيل

سلام الله
على البنت اللي خلت ضحكتي تعلى ف عز ما كان لحزني الديكتاتور سطوة .. مشيت عكس إتجاه حلمي البسيط أميال و بعد ما ايدها حضنت إيدي نولت الحلم دا ف خطوة .. أسيرك ياللي حررتيني من يأسي و أصفادي .. صالحتيني على نفسي و صالحتيني على بلادي .. مفيش غير دمعتك بس اللي هزت قلب جلادي .. صحاري الدنيا دي شاسعة لكن ماتجيش قيراط من قلبك الوادي .. باحبك ياللي رجعتيلي نفسي و نبضتي و نفسي
سلام الله
على البنت اللي خلتني أغنيلها و اغنيها ف عز ما قلبي كانت دقته بترثي

سلام الله (19) : لـ | وليد حمدي اسرائيل

سلام الله
على البنت اللي خلت قلبي يتجنن و يدمن سكة التوهان .. توديني لحد البحر و ارجع من هناك عطشان . أعود غضبان .. أبصلها . ملاك من نور . تطفي ف عيني نار و شرارة الشيطان .. و اغازلها .. توديني لحد البحر و ارجع من هناك عطشان . أعود غضبان .. أبصلها . ملاك من نور . تطفي ف عيني نار و شرارة الشيطان .
. و اغازلها . و أتبسم .. توديني لحد البحر و ارجع من هناك عطشان . أعود غضبان .. أبصلها . ملاك من نور . تطفي ف عيني نار و شرارة الشيطان .. و اغازلها .. و أتبسم .. و آجي انطق و أتكلم . أقف ساكت و متحير عشان بتبانلي محتارة
سلام الله
على البنت اللي مش كدابة مشاعرها لكن سياسية مكارة

سلام الله (18) : لـ | وليد حمدي اسرائيل

سلام الله
على البنت اللي عالجت روحي من داء اللي قبليها اللي كان م الصعب يتعالج .. و قدرت بابتسامتها تخليني طرف ف معادلة لها ناتج .. و خلت قلبي دكتور فيلسوف بعد اما كان ساذج .. حقيقية . و برده كأنها مصباح علاء الدين .. جميع المستحيلات البعيدة اتحققت بيها بحكمة و لين .. باحس كأننا رجعنا للحظة لطين . و من تاني خلقنا المولى روح واحدة لكن مقسومة على جسدين .. على قدك فساتين . من شراييني سهرت ليالي أنسجها
سلام الله
على البنت اللي خلت قلبي يستغنى عن العالم . و تبقى معاه و يحتاجها

سلام الله (17) : لـ | وليد حمدي اسرائيل

سلام الله
على البنت اللي بتصيغ من جديد علاقاتي بالأشياء .. و بتعيد تسميتها بشكل أحلى و تخترع أسماء .. ف سمت حبنا " الصياد " و سمت يأسنا " الصيدة " و سمتني أنا " العواد " و سمت نفسها " قصيدة " و سمت بعدنا " الرجفة " و سمت قربنا " التطمين " و سمت دمعنا " اللهفة " و سمت ضحكنا " التسكين " و سمت إتفاقنا " النور " و سمت إختلافنا " العين " و قالت كل شئ لازم عشان يثبت نشوف ضده .. هانتعور بشوك الحب لاجل ما نجني سوا ورده .. و انا صدقتها و هافضل مصدقها
سلام الله
على البنت اللي ما سابتليش بديل عن اني أعشقها

سلام الله (16) : لـ | وليد حمدي اسرائيل

سلام الله
على البنت اللي صعب انفض من حواليها بالرغم انها بتبقى ساعات فظة .. ساعات . ايام . سنين . فاتوا معاها كإنهم لحظة .. كاريزمتها البسيطة معقدة جدا . عادية لكنها فذة .. بتضحك . قلبي يتبرجل . بتبكي . ف موتي بيعجل .. بتهجرني . أنام راضي .. بتوصلني . يطير النوم .. تحوم ويا الحمام غربان . ف مع مين بس قلبي يحوم ؟ .. ترسيني . و لا أرسى .. تحيرني .. و لا أقسى .. و لا أنسى .. تقول يائس ؟ أقول لسة .. تقول ممكن ؟ . أقول ممكن ! .. ف تضحك ضحكة خجلانة رقيقة غرورة غجرية
سلام الله
على البنت اللي بتخليني أغرق لما اكلمها حقيقي ف شبر م المية

سلام الله (15) : لـ | وليد حمدي اسرائيل

سلام الله
على البنت اللي خلت قلبي يصحى من الموات تاني . ف مات فيها .. بتحلف ان صوت حزني القديم لما بتحضني . بيشجيها .. و قالت : صمتك المشروخ قصيدة شعر آسراني .. و قالت : لو حاسسني هادوخ . ما تتخضش . و قول تاني .. قالتلي باحب فيك حبك لكل اللي استحقوا الحب .. و قالت قلبك المعجون شجن . فرحة لثكالى القلب .. و قالت ان صدق العشق يثبت ويا ضيق الدرب .. و ابتسمت و ضمتني
سلام الله
على البنت اللي صبرت صبر قد الكون و من بعترتي لمتني

سلام الله (14) : لـ | وليد حمدي اسرائيل

سلام الله
على البنت اللي واجهت وهم قلبي بوهم متحقق .. عنيها ف وقت ما بتلمع بتبقى خرافة تتصدق .. طفولة قلبها الناضج بتجبرني أهيم و اعشق .. حضورها بيخترع جوايا عاشق من طراز نادر ..  يغني بصوت رقيق هادر .. يشوف ملامحها يلمس سر كون غامض .. و يستكشف . صفات الحي و الجامد .. و يهوى البارد الحامي . و يكره أحمى شئ بارد .. غيابها بيتنقش على روحي طفل يتيم و بيعيط .. شبح بيطوف ف كون ميت .. طريق مطعون ف صدره بشوك .. يقين خانه اليقين بشكوك .. و نار ما سابتش غير دخان
سلام الله
على البنت اللي برة عنيها بابقى غريب عديم الشان

سلام الله (13) : لـ | وليد حمدي اسرائيل

سلام الله
على البنت اللي مش بترد على شوقي الرهيب بفتور .. ماروحتلهاش ف يوم إلا و روت بالشهد أرضي البور .. آثار صوابعها على جلدي نجوم بتشع نار من نور .. أحط عنيا ف عنيها . أتوه فيهم ف ألقاني .. ألامسها و ادوب فيها . ف اموت و احيا حياة تاني .. حياة ع الأرض لكن لا شقا لا مرار .. ببسمة تجري من تحتي آلاف أنهار .. حليب و خمور .. و من فوقي شموس و بدور .. حياة حقيقية . لا زور فيها و لا أسوار
سلام الله
على البنت البريئة المجرمة الصادقة الغزال التعلب المكار

سلام الله (12) : لـ | وليد حمدي اسرائيل

سلام الله
على البنت اللي مش معصومة م الأخطاء . لكن أخطاءها عن غير عمد .. بتقدر تطفي نار صدري ببسمة رقيقة مجنونة بدون خلط الهزار بالجد . لأن البنت دي وردة ف شوكها يبان ف هيئة شوك . لكن يملك صفات الورد .. بحاول ألقى فيها عيوب . بلاقي ف كل عيب ميزة
سلام الله
على البنت اللي حنيتها هيا السر و ابتسامتها تعويذة

سلام الله (11) : لـ | وليد حمدي اسرائيل

سلام الله
على البنت اللي خلت قلبي طوعني و أوهمني انه طاوعني .. بيرضى بكل شئ منها و لو إلتاع و لوعني .. أقوله لإمتى ؟ . ما يردش . أكررها يقول : يعني .. لإمتى أشوفها و اتجنن . لإمتى تغيب أموت و احيا ؟ .. تفيد قفلة عنيا بإيه و حيرة قلبي دي صاحية ؟ .. بيهرب قلبي و يجيلك . أبات ليله . يبات ليلك .. أصلي الفجر و ادعيله . و تقسي عليه يصليلك .. جمالك آخره بينا لفين ؟ و فيه آخر لقصتنا ؟
سلام الله
على البنت اللي هيا منتهى الإيمان وهيا مبتدى الفتنة

سلام الله (10) : لـ | وليد حمدي اسرائيل

سلام الله
على البنت اللي مش شمعية التكوين .. و صعب تبان كما كل البشر من طين .. و مش من نور . معاذ الله .. و مش من نار . معاذ الله .. لكن سبحانه سواها فريدة ف كل شئ سواه

سلام الله (9) : لـ | وليد حمدي اسرائيل

سلام الله
على البنت اللي دلت جسمي على ضله .. و دلت قلبي على خله .. و صالحت كتفي على حمله .. و بوجودها الضلوع كملوا
سلام الله
على البنت اللي قادرة بكلمة من حرفين تنشف ريقي و تبله

سلام الله (8) : لـ | وليد حمدي اسرائيل

سلام الله
على البنت اللي لو وعدت . بتوفي الوعد .. قالتلي ان خفت جرح الشوك . هاتبقى ماتستاهلش الورد .. قالتلي وصولك السماوات هايحتاج الثبات ع الأرض .. قالتلي الدنيا مش لعبة هاتكسبها بقرصة نرد .. قالتلي البحر مش ممكن يوقف جريه حتة سد .. قالتلي الأمس و ان مظلم فـ  كان خطوة تجاه الغد .. قالتلي كلام بسيط لكن كما لو كان بساط سحري وصل بيا لأبعد حد
سلام الله
على البنت اللي حاربت يأسي ند لند

سلام الله (7) : لـ | وليد حمدي اسرائيل

سلام الله
على البنت اللي بتثير فيا رغبة جموحة اني أطير .. أهيم و اشدو ف فضاها الواسع الآمن كما العصفور .. بلا رهبة من الصياد . بلا أنة جناح مكسور .. عنيها الشمس بتطمني . بتعرف عنيا النور .. ألامس كفها . أسكن . ألامس خدها أتجن .. بتألم قلبي بمسكن . و تشفيه بنصل فيه يتسن .. بتجعلني بكل سذاجة أعشقها . و أعشقها بحكمة و فن .. بعيدة كأنها نجمة . قريبة كأنها سري .. باوشوشها ف كلامي لنفسي و ف نفسي يقين ان الكلام سري .. عنيدة كأنها قلبي و انا باحكيله عن غيرها .. بسيطة كأنها المرجع و انا باقرا ف تفسيرها .. غريبة كأنها الدنيا .. شهية كأنها الجنة .. بدونها الصبر كان ينفد لكن مش قادر استنى
سلام الله
على البنت الموسيقى . الشعر . و الغنوة

ازاي متحطش "سلام الله على البنت اللي دايما وقت عسري بتبقى هي اليسر.. يا محلا الكسر لو هي اللي هتداوي ف ضلوعي الكسر.. فداها عيوني لو تقبل. أموت ولا اشوفها يوم تدبل. نبيلة و قلبها أنبل. و من غيرها الحياة بتكون موات باحياه
سلام الله على البنت اللي تستاهل سلام الله" !

سلام الله (6) : لـ | وليد حمدي اسرائيل

سلام الله
على البنت اللي ليها دلال على كل اللي غافل قلبي و اتمرد عليه عن عمد و استعصى .. تقول للبحر : هايجيلك . ما تبلعهوش . و كون إلفه إلى أن يوصل المرسى .. تقول للدرب : كون أوسع إذا جالك بنص بصيرة خداعة . و حن ف عز ما تقسى .. تقول للوقت : لا تترك عقارب ساعتك اللداغة تلدغ عمره في خلسة .. تقول للحكمة : دوبي ف دمه بالتدريج . و إوعي تكوني في وجدانه يوم غصة .. تقول للذاكرة : سايسيه لحد ما في سلام ينسى .. تقول للشعر : بل شفايفه من خمر الألف و الياء و فيض من روحه ع الأوراق و داءه داويه بنفس الداء . لحد ما يكتمل بدره .. ف يصنع خاتمة للقصة
سلام الله
على البنت اللي حتى ف سلبها لقلبي الفرص . خلقتله من سلب الفرص . فرصة

سلام الله (5) : لـ | وليد حمدي اسرائيل

سلام الله
على البنت اللي بتعلمني احب الناس . و ما اكرهمش لو غابوا .. قالتلي القلب يبقى سليم إذا و هما بعاد ع العين فضل وافي لأحبابه .. قالتلي الحب . أصدق حب هو اللي انت ما بتعرفش أسبابه .. و ترضى بمره لو حتى طغى على طعم عنابه .. قالتلي الحب أحلى ما فيه . بيحفظ نظرة الصادق و يفضح دمع كدابه .. ف كون راهب ف محرابه بكل ما تمتلك من صدق
سلام الله
على البنت اللي باوصل بيها إلى آخر حدود العشق

سلام الله (4) : لـ | وليد حمدي اسرائيل

سلام الله
على البنت اللي منعت كل من حاول يدق بغدر مسماره ف خشب نعشي .. و منعت من عنيا دموع . كان ممكن إذا سالت يدوب رمشي .. و عمر ما قلبها هددني إنه ان مل راح يمشي .. بكل ما فيها من رقة بتملك كتف أمتن من كتاف أبطال . بيسندني و هايشيلني كمان لو طال .. أنا لما أكون بابكي . تهدهدني . تقويني . و تحبس دمعها ف عنيها لا تبين . و تشملني بأمومة و عطف أودعهم إله الكون بداخل قلبها اللين .. و تظهر حبها الواضح . و تظهر عشقها البين .. و تحكيلي عن الصبر الجميل . أصبر
سلام الله
على البنت اللي عملت قلبها قارب لقلبي عشان ف موج الحزن دا يعبر

سلام الله (3) : لـ | وليد حمدي اسرائيل

سلام الله
على البنت اللي واجهت وهم قلبي بوهم متحقق .. عنيها ف وقت ما بتلمع بتبقى خرافة تتصدق .. طفولة قلبها الناضج بتجبرني أهيم و اعشق .. حضورها بيخترع جوايا عاشق من طراز نادر ..  يغني بصوت رقيق هادر .. يشوف ملامحها يلمس سر كون غامض .. و يستكشف . صفات الحي و الجامد .. و يهوى البارد الحامي . و يكره أحمى شئ بارد .. غيابها بيتنقش على روحي طفل يتيم و بيعيط .. شبح بيطوف ف كون ميت .. طريق مطعون ف صدره بشوك .. يقين خانه اليقين بشكوك .. و نار ما سابتش غير دخان
سلام الله
على البنت اللي برة عنيها بابقى غريب عديم الشان